«بوابة الأسبوع» تواصلت مع نجم مصر والنادي الأهلى السابق، كابتن مختار مختار، وأجرت معه حوارا خاصا تحدث خلاله حول رأيه في أداء المارد الأحمر أمام مازيمبى الكونغولي، فى نصف نهائي بطولة دورى أبطال إفريقيا وأداء الزمالك أمام دريمز الغاني بنصف نهائي بطولة الكونفدرالية.

ونستعرض ما دار في حوار كابتن مختار مختار على النحو التالي:

1-ما هو تقييمك لمباراة الأهلى ومازيمبي؟

الأهلي فى مباراة الذهاب أكيد كانت فى عوامل كتيرة وظروف مثل الجو والملعب أدت أن أداء الأهلى يومها ميكونش أحسن حاجة.. لكن فى القاهرة الأهلى بكل تأكيد كان أفضل على الرغم أن المباراة أوقات كتيرة كانت سجال ولكن بعد إلغاء هدف مازيمبى، الأهلى اتحول بنسبة 180 درجة وعمل نص ساعة هايلة جدا جدا حسينا بخطورة الفريق ونجح فى غحراز 3 أهداف مهمين جدا جدا.

2- ما هو نجم المباراة من وجهة نظرك؟

أحمد عبد القادر على الرغم أنه كان يعيبه أنه لاعب فردى ولا يسخر موهبته الكبيرة لخدمة الفريق.. ولكن حاليا الوضع اختلف وبقى متعاون جدا مع زملائه وبقى يخدم الفريق بمهارته الفردية العالية.. علشان كدة شايف عبد القادر هو نجم المباراة لأنه اتطور جدا جدا بجانب أنه فى الأصل لاعب ممتاز.

3- ما رأيك فى عودة أكرم توفيق وعبد القادر ومحمود متولى لحسابات كولر من جديد؟

عودة فى صالح الفريق بكل تأكيد وتحديدا أكرم توفيق لأنه لاعب مميز جدا جدا وجوكر وتقدر تستفاد بيه فى أكثر من مركز والإصابة كانت للأسف حرمتنا منه وبعدته عن الفريق فترة مش قليلة، لكن مباراة مازيمبى رجعته من جديد وشايف عودته مكسب كبير جدا للنادى الأهلي ومنتخب مصر.

4-فى ظل جاهزية محمد الشناوى وتألق مصطفى شوبير تفضل مين يحرس عرين الأهلى بنهائي إفريقيا؟

أعتقد ده حاجة منقدرش نحكم عليها دلوقتى ولكن مباريات الدوري العام القادمة هى اللى هتقدر توضح هل الشناوى عاد لمستواه ولفورمة المباريات ولا لا وهل أصبح مطمئن للجهاز الفنى والجماهير ولا لا، وفى نفس الوقت شايف أن مصطفى شوبير مكسب كبير جدا للأهلى وهتكون فى منافسة كبيرة بين الثنائي وده أكيد فى مصلحة الفريق ودلوقتي تقدر تقول الأهلى يمتلك حارسين على أعلى مستوى كل واحد فيهم ممكن يقعد للتاني عادى رجعونى من جديد لأيام إكرامى وثابت البطل.

5-ما رأيك فى تصرف عمرو السولية بعد تغييره؟

عمرو السولية لاعب كبير ومن كباتن الفرقة ومكانش ينفع يطلع منه تصرف زى ده، وأعتقد أنه مش هيكرر الخطأ ده تانى من جديد لأن فعلا مينفعش الكلام الصغير ده يطلع من لاعب كبير بحجم السولية.

6-ما رؤيتك لمباراة نهائي إفريقيا بين الأهلي والترجي التونسي؟

مباراة صعبة جدا جدا فريق الترجى التونسى فريق مش سهل ومستواه اتحسن جدا خلال الفترة الماضية بجانب كدة الأهلى بيلعب على كأس إفريقيا وده فى حد ذاته تحدى صعب وقوى جدا على الرغم أن الأهلي متعود على مثل هذه المواقف، وشايف طبعا أن الأهلى أقرب بأمر الله من الترجى فى الفوز باللقب الإفريقى الغالي.

7- ماهى رؤيتك لمباراة الزمالك ودريمز الغانى؟

الحمد الله على مكسب الزمالك ووصوله لنهائى البطولة مع الأهلى لأن ده هيعود بالنفع على الكرة المصرية ومنتخب مصر، أقدر أقول بس ينقصنا عودة الجمهور واحنا فعلا هنشوف منتخب قوى جدا.. أما من الناحية الفنية أنا شايف أن الزمالك عمل مباراة ممتازة.

8- من الأقرب الزمالك أم نهضة بركان لحصد لقب بطولة الكونفدرالية؟

بأمر الله الزمالك البطل لأنه فنيا أفضل وأعلى بكتير من نهضة بركان المغربى.

9-أخيرا.. .أين كابتن مختار من التدريب؟

أنا خلاص اعتزلت مهنة التدريب واكتفيت الحمد الله بالفترة اللى اشتغلتها قبل كدة واللى بفضل الله عملت فيها شغل كويس جدا.