تحرص الفنانة منة فضالي على إبقاء حياتها الشخصية بعيدة عن أعين السوشيال ميديا والإعلام وبدأ متابعيها ومحبيها طرح التساؤلات حول حياتها الشخصية وهل توجد علاقة عاطفية في حياة منة فضالي.

والتقى موقع تحيا مصر بالفنانة منة فضالي وفتحت قلبها خلال اللقاء وصرحت عن حقيقة ارتباطها وتفاصيل عن حياتها الشخصية لأول مرة تعلن عنها كما كشفت عن مواصفات فتى أحلامها وسوف نسرد أبرز تصريحاتها خلال المقال التالي.

منة فضالي: لما ارتبط هقول أنا مش فاضية ومركزة في شغلي والرجالة كلهم عايزين الضرب

وتداول رواد مواقع التواصل الاجتماعي الكثير من الشائعات حول حياة الفنانة منة فضالي الشخصية وكشفت لموقع تحيا مصر عن حقيقة ارتباطها أو خطبتها ونفت كل تلك الأقاويل قائلة: "لما ارتبط واحب هقول لكن انا مش فاضيه للكلام دا دلوقتي انا مركزه في الشغل وفي والدتي أهم حاجة عندي والرجالة كلهم عايزين الضرب.. أنا اتعودت ابقى لوحدي وعايشه من غير راجل ومستريحة نفسيًا، عندي اكتفاء ذاتي غير طبيعي".

وعلقت على مصطلح "الرجل التوكسيك" المنتشر بين الفتايات هذه الأيام وقالت: "عندي كلاب بتاعتي ومرتبطة بيهم جدًا، مقدرش ارتبط بشخص يتحكم فيا وفي حياتي وينكد عليا وهو يبقى متملك كل شئ وعايز يحرمني من كل شئ بحس انها انانية، والراجل التوكسيك دا يقعد في البيت بقى انا كبرت هو انا لسه صغيرة عشان واحد يقولي البسي ايه وكلي ايه هقولك اطلع برا عند امك علي طول".

مواصفات فتى أحلام منة فضالي: مبقاش سهل ألاقي راجل يجذبني

سؤلت منة فضالي عن مواصفات فتى أحلامها أو أكثر صفة تجذبها في الرجل وقالت: "مبقاش في حاجه تجذبني في الراجل حاليًا كان ممكن زمان.. وممكن دلوقتي الراجل اللي احبه لازم يكون شبهي وانا هديت وعقلت عن زمان وحياتي عبارة عن السفر ولو مش سفر بحب اقعد في البيت كتير مبحبش اخرج كتير، ومهتمة بأمي وصحتها لأني مش ضامنة أمي هتمشي امتى".

وتطرقت خلال حديثها إلى حياتها مع والدتها قائلة: "بقيت استمتع بكل الوقت مع ماما عشان حسيت اني ضيعت وقت كتير اوي في الخروج والسفر بعيد عنها ف بتبقى قاعده بتتفرج على التليفزيون يا بتنام لوحدها الا لو سافرت معايا ف بقيت حريصة أقضي معاها أكبر وقت".

منة فضالي: الممثلة اللي بتطلع موردة خدودها وشفايفها دي زيرو تمثيل وبطلع في أغلب أعمالي من غير مكياج

وأبدت منة فضالي رأيها في الفنانات اللاتي تظهر في الأعمال وهن يضعن المكياج غير مناسب مع الشخصية التي يقدمونها وأكدت أنهن لم يمسوا للتمثيل والفن بصلة وقالت: "انتي كممثلة لازم تخدمي الدور وتطلعي بشكل مختلف دايما، أنا كنت طالعه في نسل الاغراب شكلي مش حلو لأني كنت طالعه مريضة قلب ومينفعش اطلع حاطة ميك اب وموردة خدودي وشفايفي اللي بتعمل كده دي زيرو تمثيل، لكن انتي خلاص اتعرف انك زي القمر فهتعملي دور اعمليه صح لو مجنونة انكشي شعرك متستحميش".

وروت موقف حدث معها في أحد الأعمال الفنية وقالت: "قبل كده كان معانا واحده في عمل رافضة تلبس كوتشي مش براند وكنا هنتشل والراجل المسؤول عن الأخطاء عمال يشد في شعره في الآخر قالتلهم مش هصور لازم البس الكوتشي بتاعي ف سيبناها براحتها".

وأضافت: "دا بشوفه من الإحداث، ما انا بطلع قمورة في حتت تانية انا اغلب شغلي بطلعه من غير مكياج وفي سره الباتع كنت عاملاه من غير مكياج وكنت بعيط ووشي ورم وعنيا ورمت والدم، وطلاما قبلت اني اكون ممثله يبقى لازم اشتغل على نفسي قبل شكلي وقبل ما اطلع حلوه لازم اشوف الدور متطلب كده ولا عايز اطلع قردة، انا موافقة اطلع قردة".

منة فضالي تكشف لتحيا مصر عن أعمالها القادمة: بحضر لمسلسل بدون مقابل

وأعلنت منة فضالي عن مشاركتها في مسلسل بدون مقابل بطولة النجم هاني رمزي وأنها تواصل استعدادها له، وكان من المقرر عرضه ضمن السباق الرمضاني الماضي لكن تم تأجيل عرضه وقالت: "بكمل تصوير مسلسل لسه مخلصش اسمه بدون مقابل مع هاني رمزي و وفاء عامر، داليا البحيري، عمرو عبد الجليل، أيتن عامر، نسرين طافش، محمد رضوان، خالد سليم، والمسلسل كوميدي دراما لكن دوري مش كوميدي".