المخرج محمد نصر يرد على رضا عبد العال، شن المخرج محمد نصر هجوم على رضا عبد العال لاعب القطبين السابق بسبب الاتهامات التى وجهها الاخير له.

هجوم رضا عبد العال على المخرج محمد نصر

حيث اتهم رضا عبد العال المخرج محمد نصر بانه سبب صعود الاهلى الى نهائى دورى أبطال إفريقيا، بسبب هدف مازيمى الملغى، والذى تم الغائه بسبب تقنية الفيديو، ليرد عليه محمد نصر بهذه الكلمات، حيث كتب ..

رد المخرج محمد نصر على رضا عبد العال 

وعبر حسابة على فيس بوك كتب محمد نصر رداً على رضا عبد العال قائلاً :

أولا مبروك لنادى الزمالك التأهل للنهائي وعقبال البطولة وكمان مبروك الأهلي بطل كأس الكرة الطائرة ويستمر الأهلي ملوك الصالات بجدارة.

ثانيا وده الأهم كـ رضا عبد العال هو انت بتزوم عليا ليه وانت عارف إني مش مخرج ماتش الأهلي.

ثالثا هو انت تعرف ايه عن الفأر ولا هو أي هجص بيتقال وخلاص وناس كتير زامت عليا وظلمتنى لمجرد إن أسمى محمد نصر الى بيكسب الأهلي البطولات وكان مافيش لعيبة ولا مدير فنى ولا إدارة ولا جمهور.

رابعا كل الناس بما فيهم انت لازم يعرفوا إن الفأر هو المتحكم فى المخرج مش العكس لان كل الكاميرات الى عندى هو نفسها عند الفأر إلى بيراجعها كلها ويستدعى الحكم ويدى قرار.

خامسا ممنوع منعا باتا ان بعد قرار الفار انك تعيد أي إعادة غير إلى راجعها الفار فقط.. سادسا عشان لعبة نيدفيد وناصر إلي ممكن ترقى لطرد مباشر ممنوع إعادة أي لعبة لم يتخذ الحكم أو الفار فيها قرار وده من لجنة الحكام وأعتقد لازم اللجنة تراجع نفسها في التعليمات دى لأن لازم يكون فيه إعادة علشان تزيل أي شك ومحدش يظلم المخرج.

سابعا أنا مش ساحر هوقف الكرة على ايد اللاعب أو اجيب زاويا معينة تلغى هدف أو ضربة جزاء أو العب بالكاميرات جلا جلا ده كلام مش صح.

أخيرا مش عيب إن الإنسان يغلط ويعتذر زى مانا عملت مع جمهور الزمالك رغم إن الفار وتعليماته هو الأساس مش المخرج وممكن اقول تصريح فى لحظة انفعال من شخص مستفز وده حصل واستغفرت ربنا عليه وحجيت وربنا يسامحنى لان شغلنا للجمهور مش لنفسنا مفيش انتماء فيه.

أنا أهلاوى واعتز بأهلاويتي وحبى للاتحاد أيضا لكن برة شغلى لانى لما اعمل شغل محايد على الجميع الكل هيحترمنى وده الأهم مع مراعاة ضميرك ومراعاة المولى وعدم ظلم اى فريق كبير أو صغير لأن العمر قصير.

دي فرصة اشرح للناس ويفهموا قصة الفأر مع إن لجنة الحكام كابتن وجيه وكابتن فاروق المفروض تطلع ببيان تقول للناس تعليماتها ايه للمخرجين ويشرحوا دور الفار ودور المخرج عشان الناس ترتاح ويبقى الاحترام بينا هو الأساس.