تفاصيل جديدة في قضية جواهرجي بولاق ابو العلا الخواجة حسني الخناجري، حيث استمعت النيابة لاعترافات طليقة المتهم بإنهاء حياة الجواهرجي، خلال التحقيقات ويستعرض موقع تحيا مصر تفاصيل أقوال طليقة قاتل جواهرجي بولاق ابو العلا.

اعترافات طليقة جواهرجي بولاق ابو العلا

باشرت نيابة وسط القاهرة الكلية التحقيقات في قضية مقتل الخواجة حسني الخناجري جواهرجي بولاق ابو العلا، التي حملت رقم 514 لسنة 2024 إداري بولاق الدكرور، حيث استمعت لأقوال المتهمة مي ممدوح طليقة قاتل جواهرجي بولاق ابو العلا والتي كشفت العديد من المفاجآت خلال التحقيقات معها.

وقالت مي ممدوح طليقة قاتل جواهرجي بولاق ابو العلا، أنا اتعرفت على محمد سنة 2008 وساعتها كان بيلعب في الجيم بتاع أخويا وبعدها اتقدم لي ووافقت واتجوزته وأنا سني 18 سنة، وفضلت متجوزاه 14 سنة وعندي منه 6 أطفال، وفي الفترة دي كان ينصب على ناس وأبوه يسد وراه ويدفع له ويلم أي مشاكل وراه، بس بعد وفاة والده الظروف بقت وحشة جدا وولادي مكنوش لاقيين ياكلوا بسبب شرب الترامادول والحشيش.

طليقة قاتل جواهرجي بولاق: كان بيضربني ويشتمني

وتابعت طليقة جواهرجي بولاق ابو العلا، بدأت استلف فلوس من امي وابويا وما قدرتش استحمل العيشه دي واضطريت اني انزل اشتغل وبقيت أعمل تفاح زي الفريسكا وأحط فيه الخلة وأنزل ابيعه في الشارع وكانت بتجيب لي فلوس من الأطفال وكنت بجيب تقريبا 250 جنيه وهو في البيت يأكل ويشرب ببلاش، وبعدها فتحت محل فشار وحمص وفريسكا ووافل وبعد كدة بقيت أعمل قهاوي وأكسب منها بس اخواته مكنوش بيسبوني في حالي و كانوا بيقولولي انتي ما تشتغليش كنت بقولهم طيب انا اعمل ايه عايز أجيب أكل لعيالي ومحمد فضل قاعد في البيت وأنا بصرف وبعدها ابتدى يدخل في عمليات النصب على ناس وأنا زهقت وطلبت الطلاق في 2021.

وأكملت طليقة قاتل جواهرجي بولاق ابو العلا، طلقني فعلا ودفعت فلوس المأذون ويعدها الولاد فضلوا معاه مرضيش يديهملي وبعدها بفترة علاقتي اتقطعت بيه وحاول أنه يرجع لي وأنا مرضتش وابتدى يطاردني ويهددني بالقتل وفضلنا كدة لحد شهر يونيو 2023 تقريبا كلمني وقالي أنا هجيب لك العيال وقالي عايز اقعد معاكي وأنا رفضت راح ضربني ومشي، ويوم 27 فبراير 2024 لقيت سلمى بنتي بتقول بابا حولي فلوس على الموبايل 400 جنيه بس من رقم غريب، ونزلت سلمى الساعة 12 وراحت قابلت أبوها، وبعدها كلمتها لقيت التليفون مقفول وكلمته بردو لقيت التليفون مقفول ونزلت اشتري حاجات الساعة 3 لقيته بيتصل بيا الساعة 4 وقولت له انت فين وسلمى قافلة الموبايل ليه قالي كنت بصلح الموبايل، قلت له أنا هاجى اخد سلمى منك.

طليقة قاتل الخناجري: جاب لي سبيكة وشوية مشغولات ذهب

وأضافت طليقة قاتل جواهرجي بولاق ابو العلا، رحت له وقابلته ولما روحت لقيت سلمى بتشاور على غويشتين وسلسلة وحلق لبساهم وقالتلي شوفي بابا جاب لي أيه، وأداني سلسلة وحلق وحلقين لـ مكة ومليكة، وقالي شوفي الخايبة كنت مديها سلسلة تقيلة بس مارضيتش بيها، وخدت الخفيفة، وأنا اديتها الحاجة عشان جهازها ورحنا مطعم أكلنا وأحنا قاعدين قال ل سلمى قومي قلعيني السلسلة دي وأدهاني وقالي دي هدية عيد ميلادك عشان إنتي صرفتي على العيال كتير.

قولت له ساعتها اديها لـ سلمى قالي لا خديها روحت خدتها منه ومشيت أنا وسلمى، ولما سألته قالي أنا خدت نصيبي من الشغل وقلت له شغل ايه ده قالي بسافر أسوان وشغل في فنادق، وطلب مني أروح المكتب معاه رفضت قالي متخافيش البنت معانا، وطلعنا المكتب وأدى سلمى سلسلة ووراني كل الذهب اللي معاه وخدت منهم سبيكة 2.5 جرام ونزلنا واداني 200 جنيه روحت اديتها لـ سلمى.