الثلاثاء 14/مايو/2024 - 01:35 ص

تحدثت الفنانة فريدة سيف النصر عن زواجها وتعرضها للخيانة وطلاقها أكثر من مرة ورفضها لزواج المُحلل حتى تعود لزوجها، إلى جانب كشفها عن سبب رفضها الزاوج مرة أخرى.

وقالت فريدة سيف النصر خلال لقائها مع الإعلامي عمرو الليثي في برنامج واحد من الناس: اتجوزت مرة واحدة من أسامة الشافعي.. لكن الجوازة نفسها تلاتة لأننا كنا بنطلق ونرجع ونطلق ونرجع لأننا كنا مجانين خالص وبنحب بعض، وتالت مرة ما قبلتش يكون عندي محلل ولا هو قبل وكان لأسباب جامدة بسبب واحدة دخلت في النص وكنت بسامحه كتير لكن في الموضوع ده مكانش ينفع. 
 

وكشفت فريدة سيف النصر تفاصيل زواجها قائلة: كنت بعمل مسرحية الغبي وأنا على مسرح الجلاء، وجت شخصية مهمة مش مصرية عاكست وقلت أدبها، ضربته بالشبشب جابوا ليا القسم ظابط المباحث وكان أسامة الشافعي اللي اتجوزته بعد الموقف ده، قال عندها حق أنها قلت ادبها عليه والتاني بتاع سفارة وشخصية مهمة، وأسامة قالهم دي قريبة مين، قالوا لي بنت عم سيف بيه النصر حمدي المفتش بتاعك ومن هنا حصل تعارف وطلبني للجواز لكني كنت رافضة.

والدي ضربني بعد فيلم 4-2-4 

وأضافت: قلت له مش عاوزة اتجوز عاوزة انطلق في التمثيل، ومكنتش لسه عملت فيلم 4-2-4 ولبست فيه بدلة لأني كنت عيلة وكنا وقتها بنلبس مايوه على البحر عادي لكن لما والدي شاف الفيلم ضربني وكنت أول مرة اتهان في حياتي وقال لي لازم تتجوزي.

فريدة سيف النصر تكشف تفاصيل تعرضها للخيانة 

وكشفت فريدة سيف النصر تفاصيل تعرضها للخيانة قائلة: عمري ما خونت حد لذلك ما صدقش أني اللي عملت معاه حاجة كويس يعمل معايا كده لأن الأمين مش بيخون. 

وأضافت: وصاحبتي أوي وظروفها صعبة جدا كنت أسيب لها البيت والعيال وكنت أساعدها وتاكل وتشرب وهي مش حلوة لكن دماغ وأنا كان عندي ثقة في نفسي واكتشت أنها اتجوزته وصعب صاحبتي تخوني وسايبة ليها كل حاجة

وأكملت فريدة سيف النصر عن رد فعلها بعدما علمت بخيانة صديقتها لها قالت: ولا عملت ليها حاجة رغم أنها هدت بيتي وسافرت واشتغلت بره ومحمد ابني بوه كان بياخده عندها في الإجازات وكنت بجيب لها هدايا هي وعيالها وهي سمعاني ومفكرتش اتجوز وجاني عروض جواز لأني كنت جميلة جدا وكان كل هامي محمد واتعقدت من الرجالة لو مع السمرا يبقى عاوز البيضة على رأي محمد رمضان.  

فريدة سيف النصر تكشف حقيقة غيرة سمية الألفي منها 

كما كشفت فريدة سيف النصر حقيقة غيرة الفنانة سمية الألفي منها بسبب فاروق الفيشاوي خاصة أنها شاركت معه في أكثر من عمل قائلة: مش هقول غير حسبي الله ونعم الوكيل لأن سمية الألفي بنت خالة ولاد عمي.. وفاروق الفيشاوي  كنت بقول له ابيه وكان أي شغل ياخدني معاه وبيدعمني واللي اتقال ده بسبب الغيرة.