الخميس 16/مايو/2024 - 06:09 ص

شهدت منطقة كرداسة التابعة لمحافظة الجيزة واقعة مأساوية، حينما أقدم شاب يدعى يوسف على ابتزاز فتاة تدعى ايمان، عن طريق التقاطه بعض الصور لها خلسة وهي داخل منزلها مستغلًا كون المتهم والمجني عليها مقيمين بالشارع ذاته -جيران- وذلك بهدف الحصول على مبلغ 50 ألف جنيه من المجني عليها، وهو ما دفع الضحية إلى تحرير محضر لما لحق بها، لتقنع أجهزة الأمن الفتاة باستدراج المتهم حتي تم إلقاء القبض عليه، وعقب انتهاء التحقيق تم إحالته للمحكمة الجنائية.

أقوال المجني عليها في قضية ابتزاز شاب لفتاه بكرداسة

وحصل القاهرة 24 على نص التحقيقات في القضية، وجاءت أقوال المجني عليها: اسمي إيمان. ع ربة منزل ومقيمة بناهيا مركز كرداسة محافظة الجيزة، وبسؤالها عن سبب وجودها بسرايا النيابة؟ أجابت: أنا جيت علشان النيابة طلبتني في القضية رقم 40 لسنة 2021 اقتصادية جنح منشأة القناطر.

وبسؤالها عن ما هي تفصيلات شكواها؟
أجابت: أنا متزوجة من المدعو محمد. ي وكنت مقيمة معه في بيت عائلته ناهيا ويوم 3/8/2021 حصلت مشاكل بيني وبين زوجي فأنا خرجت من البيت وغضبت عند أهلي، وفوجئت بعدها يوم 30/8/2021 لقيت رسالة جايالي على الواتساب من رقم غريب، وبيقولي إن عنده ليا صور وفيديوهات وبيهددني إني لو مدتلوش 50 ألف جنيه هينشر الصور والفيديوهات على الفيسبوك ويفضحني بيها، فأنا مصدقتوش لحد ما لقيته باعتلي صور وفيديوهات متاخدة ليا جوه بيتي من غير هدوم، ومتصورة من باب شقتي فأنا خفت وقلتله أنا هبلغ عنك الحكومة، ومش هديك حاجة بس هو زود شتيمة وقلة أدب وأنا مكنتش عارفة أتصرف إزاي فعملتله حظر.

وأكملت: وفي نفس اليوم رحت مباحث الإنترنت عملت محضر وقالولي ارفعي عنه الحظر واتكلمي معاه بالهداوة عشان نعرف نوصل لصاحب الرقم ده، ومتحاوليش تحسسيه إنك عملتي محضر أو أي حاجة عشان ميخافش وفعلًا عملت كده، بس وأنا هناك في مباحث الإنترنت لقيت يوسف. ط. ا "المتهم في القضية" بيبعتلي رسايل على الواتساب وبيتصل بيا على التليفون بيقولي الحقي في مصيبة في حد باعتلي صورك وبيساومني بيها على فلوس، وساعتها أنا بدأت أشك فيه عشان الصور والفيديوهات دي متاخدة من البيت عندي، وكمان أنا مكنتش قلت لحد الموضوع ده خالص واتفاجئت بيوسف عارف تفاصيل عنه فأنا قولت للمباحث على اسمه وادتهم رقم تليفونه.

وأضافت: وبعد كده مشيت وقالولي اتواصلي معاه وطمنيه كأنك هتجهزيله المبلغ اللي هو عاوزه، وفي نفس الوقت اللي كنت بحاول أساوم فيه اللي بيهددني، يوسف بدأ يتصدر في الموضوع وقالي أنا هحميكي متخافيش واتفق معايا انه يبقى همزة الوصل بيني وبين اللي بيهددني عشان قالي انتي متعرفيش لما تقابليه أو تكلميه ممكن يعمل فيكي حاجة أو يأذيكي، بس أنا لما فضلت أماطل مع اللي بيهددني قالي إن المبلغ اترفع لـ 100 الف جنيه، واللي لو مجبتش الفلوس قبل يوم 10/9/2021 هيزود المبلغ ثاني، وكل ده أنا كنت بحكيه ليوسف وهو كان بيقولي اتصرفي في أي مبلغ نسكته بيه دلوقتي وبعدين نشوف الباقي.

وأردفت: فأنا الشك بدأ يزيد جوايا إن يوسف له يد في الموضوع فأنا طاوعته وعملت كأني جهزت جزء من الفلوس، وقلت لـ يوسف تعالى عند بيت عمي علشان أديك الفلوس وتوديها للشخص اللي بيهددني، وفعلًا جالي يوسف علشان ياخد الفلوس وساعتها واجهته بكل حاجة وهو في الأول أنكر بس أنا قلتله أنا عاملة فيك محضر ولو مورتنيش أنت مخبي الحاجة فين أنا هطلع على النيابة، ساعتها يوسف طلع التليفون بتاعه من جيبه ووراني الصور والفيديوهات اللي هو مخبيها عنده، واعترف إن هو اللي عمل كده وسجلتله اعترافه على التليفون بتاعي، وساعتها أهلي قرروا يتصلوا بأهله علشان ييجوا يستلموا يوسف من عندنا ويعرفوا باللي عمله.

وأشارت: ولما جم حكينالهم اللي حصل ووريناهم الصور، وأمه لما عرفت أغمى عليها وساعتها القعدة اتفضت على موعد آخر للصلح، وبعدين اكتشفنا إن يوسف عمل محضر في المركز بسرقة تليفونه المحمول اللي كان عليه الصور والفيديوهات بتاعتي، ومن بعدها أهله بدأوا ينشروا في البلد إن أنا اللي كنت بصور نفسي الصور دي وببعتها ليوسف، ولحد دلوقتي أنا حقي مرجعليش لغاية ما المحامي كلمني وقالي إن النيابة عاوزاني عشان أتسئل النهاردة وده كل اللي حصل.

من جانبها عاقبت محكمة جنايات جنوب الجيزة الابتدائية المتهم بابتزاز فتاة عبر تطبيق واتساب، من خلال تهديدها بنشر صور خاصة لها بغير رضاها، بالحبس سنتين مع الشغل.